Абай облысының Ақсуат ауданында «Асыл бесік – Ақсуат» спорт және өнер фестивалі өтті. Ұлттық спортты, өнерді, білім мен руханиятты тоғыстырған ауқымды шараға еліміздің түкпір-түкпірінен спортшылар, өнерпаздар мен қонақтар жиналды. Фестивальдің ашылу салтанатында өңір басшысы Берік Уәли құттықтау сөз сөйлеп, шараның маңызына тоқталды, деп хабарлайды Tura18.kz порталы облыс әкімінің баспасөз қызметіне сілтеме жасап.
Қойнауы құтқа толған, баурайы жұртқа толған Тарбағатайдың еңісін жайлаған Ақсуат жері – халқымыздың тарихы мен тағдырында айрықша орны бар қасиетті мекен. Елдің сөзін сөйлеп, ұлт руханиятын байытқан, түгін тартса май шығып, тасын түртсе тарих сөйлейтін бұл өңір талай тау тұлғаны дүниеге әкелген тағылымды өлке. Сондықтан бүгінгі бас қосудың дәл осы қасиетті топырақта өтуінің өзіндік мәні бар. Мемлекет басшысы Қасым-Жомарт Кемелұлы Тоқаев: «Біз отаншыл және мемлекетшіл болуымыз керек. Шын мәнінде, туған жеріңді сүюден асқан бақыт жоқ. Жүрегі Отаным, Елім, Жерім деп соққан адам ештеңеден қаймықпайды», – деп атап өткен болатын. Осындай елін сүйген, елі сүйген азаматтар біздің ортамыздан табылып отыр. Дәстүрлі түрде өткізіліп келе жатқан дүбірлі тойдың шашбауын көтерген атымтай жомарт жандарға, жерлесіміз Дулат Тастекеевке және Қайырлы Хасеновке барша аудан, облыс жұртшылығы атынан алғысымды білдіремін! Биыл бұл фестивальдің маңызы бұрынғыдан да арта түсті. Өйткені, «Асыл бесік – Ақсуат» фестивалі республикалық деңгейде өткізілетін мәдени-көпшілік іс-шаралар тізбесіне енгізіліп, кең көлемде аталып өтуде. Бұл – Ақсуат өңірінің тарихи-рухани әлеуетіне берілген жоғары баға. Фестиваль бағдарламасының өз бастауын халқымыздың ардақты перзенті, елдік пен ерліктің символына айналған Ырғызбай ата кесенесінен алуы – өткенге тағзым мен рухани сабақтастықтың айқын белгісі. Осымен тоғызыншы рет ұйымдастырылып жатқан фестиваль ұлттық спорт пен спорт пен өнерді, білім мен мәдениетті бір арнаға тоғыстырып отыр, – деді аймақ басшысы.
Шара барысында ұйымдастырушылар көпбалалы анаға пәтер кілтін тапсырды.
Сондай-ақ «Тарбағатай тарланы», «Асыл ана», «Асыл тас» медальдары, екі студентке грант берілді. Фестиваль аясында алғаш рет республикалық тоғызқұмалақ турнирі ұйымдастырылды. Қазақ күресінен ASSYL ARLAN турнирі, ASSYL TULPAR бәйгесі, аударыспақ және «Артық білім – кітапта» облыстық зияткерлік байқауы өткізілді. ASSYL ARLAN турнирінде өгіз палуан мен түйе палуан анықталса, ASSYL TULPAR аясында 25 шақырымдық аламан бәйге, 15 шақырымдық топ бәйге және 20 шақырымдық «Ақсуат арғымағы» жарысы болды. Үш күнге жалғасқан фестиваль бағдарламасы Ырғызбай ата кесенесіне тағзым етумен басталып, ұлттық спорт жарыстары, мәдени-көпшілік іс-шаралар, театрландырылған қойылымдар мен концерттік бағдарламаларды қамтыды. Фестиваль аясында ASSYLTAS театрының «Ауыл кеші көңілді» музыкалық қойылымы көрсетіліп, гала-концерт ұйымдастырылды.
