Абай облысының Ақсуат ауданында инфрақұрылымды дамыту және тұрғындарға қолайлы орта қалыптастыру бағытындағы жұмыстар жүйелі түрде жалғасып жатыр. Аудан орталығында абаттандыру жобалары кезең-кезеңімен жүзеге асырылады, деп хабарлайды Tura18.kz.
Биылғы негізгі жұмыстардың бірі – Ақсуат ауылындағы Қабанбай көшесі бойында жүргізіліп жатқан жаяу жүргіншілер жолын жаңарту жобасы. Ұзындығы 1,2 шақырым болатын аумақта абаттандыру, күтіп ұстау және көше жарықтандыру жүйесін орнату жұмыстары атқарылуда.
Жоба аясында түнгі жарықтандыруға арналған 92 бағана мен қажетті техникалық жабдықтар жеткізілген. Қазіргі уақытта оларды орнатуға арналған дайындық жұмыстары толық аяқталған. Алдағы кезеңде жарық бағаналарын орнату және іске қосу жоспарланып отыр.
Сонымен қатар, жаяу жүргіншілер жолының сапасын арттыру мақсатында жиектастар жеткізіліп, құрылыс-монтаж жұмыстары кезең-кезеңімен жалғасуда.
Аудан әкімдігінің мәліметінше, аталған жоба ауылдың сәулеттік келбетін жақсартуға, тұрғындардың қауіпсіздігі мен жайлылығын арттыруға бағытталған. Жоспарға сәйкес барлық жұмыстарды 2026 жылдың 10 мамырына дейін аяқтау көзделіп отыр.
Жалпы, Ақсуат ауданында инфрақұрылымды жаңарту және абаттандыру бағытындағы жұмыстар алдағы уақытта да жалғасын таппақ.
