Семей қаласында 2025–2026 жылғы жылыту маусымы аяқталысымен келер қысқа дайындық қолға алынды. Қала басшылығы жылу көздері мен инженерлік инфрақұрылымның жағдайын ерте бастан пысықтап, алдағы жылыту маусымын тұрақты өткізуге басымдық беріп отыр, деп хабарлайды Tura18.kz.
Облыс әкімі Берік Уәлидің тапсырмасына сәйкес, биыл жазда тұрғындарды ыстық сумен қамтамасыз ету жалғасып жатыр. Бұл ретте коммуналдық қызметтердің негізгі міндеті – жылу жүйелерін жаңғырту мен жөндеу жұмыстарын уақытылы аяқтау.
Дайындық барысымен танысу мақсатында Семей қаласының әкімі Әділет Қожанбаев қаланың негізгі жылу нысандарын аралады. Атап айтқанда, «Орталық» және «РК-1» жылу қазандықтарында, сондай-ақ ЖЭО-1 кәсіпорнында болып, жүргізіліп жатқан жөндеу жұмысының барысын тексерді.
Мамандардың мәліметінше, қазір барлық нысанда жабдықтарды жаңарту, техникалық қызмет көрсету және жоспарлы жөндеу жұмыстары қарқынды жүргізіліп жатыр. Жұмыс кестесіне сәйкес, негізгі жөндеу шаралары жылыту маусымы басталғанға дейін толық аяқталуға тиіс.
Қала әкімі жылумен қамту жүйесінің тұрақты жұмысы тұрғындардың тұрмыс сапасына тікелей әсер ететінін атап өтті.
Жылу беру маусымына дайындық – аса маңызды міндет. Бұл жұмыстардың сапасы мен мерзімінде орындалуы қала тұрғындарының тұрмыс-тіршілігіне тікелей әсер етеді. Сондықтан әрбір учаске мен нысан күнделікті бақылауда болады, – деді Әділет Қожанбаев.
Кейінгі жылдары еліміздің көптеген өңірінде инженерлік инфрақұрылымды жаңғырту мәселесіне ерекше көңіл бөлініп келеді. Мамандардың пікірінше, жылыту маусымына дайындықты ерте бастау апатты жағдайлардың алдын алуға, желілердің сенімділігін арттыруға және қыс мезгілінде тұрғындарды тұрақты жылумен қамтамасыз етуге мүмкіндік береді.
Қала әкімі жауапты бөлімдер мен коммуналдық қызмет басшыларына жөндеу жұмысын белгіленген мерзімде аяқтауды тапсырды. Сондай-ақ барлық нысандағы дайындық барысын тұрақты бақылауда ұстау қажеттігін атап өтті.
