Семейде жарық көрген жаңа басылым ұлттық руханиятты байыта түсті. «Абай жолы» кітапханасы сериясы аясында ақын Қалихан Алтынбаевтың бұрын-соңды жарияланбаған мұралары оқырманға жол тартты, деп хабарлайды Tura18.kz.
Ғалым Құралай Төлебаева ұзақ жылдар бойы архив қорларында сақталған қолжазбаларды зерттеп, ақын шығармаларын ғылыми айналымға енгізіп келеді. Соның нәтижесінде «Қалихан Алтынбаев шығармалары» атты жинақ жарық көрді. Жаңа кітаптың тұсауын облыс әкімі Берік Уәли кесті
Жинаққа ақынның «Би баба» дастаны, сондай-ақ ел тарихы мен жер тағдырына қатысты зерттеу мақалалары мен аңыз-әңгімелері енген. Бұл еңбектердің тарихи және рухани құндылығы жоғары деп бағаланып отыр.
Мамандардың айтуынша, мұндай жобаларға мемлекет тарапынан қолдау көрсету – ұлттық сананы нығайтып, рухани мұраны сақтаудың маңызды тетігі. Қалихан Алтынбаевтың шығармалары да тарихи шындықты айқындап, Ертіс өңірі мен Қалба–Қарабұжыр аймағының қазақ жері екенін дәлелдейтін маңызды дереккөздердің бірі саналады.
