Көкпекті ауданы Тассай ауылының тумасы, атбегілік дәстүрді жалғастырған Азамат Слямовтың «Маралқасқа» атты жүйрігі Жамбыл облысында өткен «ӘУЛИЕАТА ЖҮЙРІГІ – 2025» облыстық ашық турнирінде 35 шақырымдық аламанда оза шауып, бірінші орынды иеленді, деп хабарлайды Tura18.kz.
Бұл дода – еліміздің беделді бәйгелерінің бірі саналады. Қатысушылар Қазақстанның түкпір-түкпірінен жиналып, ұзақ қашықтықтағы нағыз төзімді жүйріктердің бабы сыналған сын еді. Сол сында Көкпектінің тұлпары мәреден дара келіп, 4 млн теңге көлеміндегі жүлдені қанжығаға байлады.
Жүйріктің бапкері Дидар Слямов пен шабандозы Заман Ақжол аудан абыройын асқақтатты. Ал төрт жасар «Маралқасқа» – иесінің өз қолымен өсіріп баптаған, «Найман» атты атақты айғырдың тұқымынан тараған асыл тұқымды тұлпар.
Бүгінгі таңда «Маралқасқа» 8 рет ірі жарысқа қатысып, бірнеше мәрте топ жарып, жүлделі орындардан көрініп жүрген нағыз чемпион ат. Бұл – Слямовтар әулетінің жылқыға деген ықыласы мен еңбегінің жемісі.
Ат спортына ерекше үлес қосып, ұлттық дәстүр мен намысты ту еткен осындай отбасылардың еңбегі көпшілікке үлгі. Көкпектілік жұрт бұл жеңісті зор қуанышпен қабылдап, Азамат Слямов бастаған бапкерлер мен шабандоздарға шын жүректен алғыс білдірді.
Маралқасқа жеңісі – Көкпектінің мерейі!
Бұл жеңіс – туған жердің даңқын асырған, намыстың туын биік ұстаған еңбектің, табандылықтың және баптың айғағы.
Әмір Бек
