Абай облысы Аягөз ауданы әкімінің орынбасары болып Нұғымаров Айбек Серікболұлы тағайындалды, деп хабарлайды Tura18.kz.
Айбек Серікболұлы 1987 жылы 3 маусымда Абай ауданы, Құндызды ауылында дүниеге келген. Ол Семей политехникалық колледжін заңгер мамандығы бойынша бітірген. Сондай-ақ Семей мемлекеттік педагогикалық институтын денешынықтыру, Қазақ инновациялық гуманитарлық – заң университетін заңгер мамандықтары бойынша тәмамдаған. Құқықтану магистрі (Еуразия ұлттық университеті) дәрежесін алған.
Еңбек жолын 2010 жылы Семей қаласы бойынша Шығыс Қазақстан облыстық Олимпиадалық резервтегі №1 балалар–жасөспірімдер спорт мектебінде жаттықтырушы–оқытушы болып бастаған.
2013-2019 жылдары «ШҚО ДШС және спорт басқармасының бұқаралық спорт түрлерінен жоғарғы спорт шеберлігі мектебі» КММ аға нұсқаушы–әдіскер болып еңбек етті.
2019 жылдан бастап Семей Көлік колледжінің директоры қызметін атқарды.
Айбек Серікболұлы спорттық мәнсабында қазақ күресінен Қазақстанның еңбек сіңірген спорт шебері, дзюдо мен самбодан спорт спорт шебері дәрежелерін иеленген. Қазақ күресінен 10 дүркін Қазақстан чемпионы, төрт дүркін Азия чемпионы, Әлем кубогының үш дүркін иегері, Қазақ күресінен әлемнің төрт дүркін чемпионы, «Еуразия барысы» халықаралық турнирінің төрт дүркін чемпионы, «Әлем барысы» халықаралық турнирінің үш дүркін чемпионы, «Қазақстан барысы» турнирінің екі дүркін чемпионы атанған.
Республикалық саяси кеңестің мүшесі, AMANAT партиясы саяси кеңесінің мүшесі, VII, VIII шақырылған Абай облыстық мәслихатының депутаты болған. Бірқатар мемлекеттік награда мен жоғары дәрежелі марапаты бар.
