Абай облысында жалпы құны 54 млрд теңгеден асатын жеті ірі инвестициялық жоба жүзеге асырылмақ. Бұл туралы аймақ басшысы Берік Уәлидің төрағалығымен өткен өңірлік үйлестіру кеңесінің кезекті отырысында мәлім болды, деп хабарлайды Tura18.kz.
Жиында жалпы құны 54 млрд теңгеден асатын жеті жоба ұсынылып, олардың аймақтың өнеркәсіп, ауыл шаруашылығы, логистика және туризм салаларын дамытудағы маңызы талқыланды.
Жобалар қай өңірлерде жүзеге асады?
Инвестициялық бастамалар Семей қаласы, Жарма, Жаңасемей, Бородулиха және Аягөз аудандарында іске асырылмақ. Инвесторлар ұсынған жобалар төмендегідей бағыттарды қамтиды:
- гастро-парк ашу;
- ағаш өңдеу өнеркәсіптік паркін салу;
- дәнді дақылдар мен күнбағысты тамшылатып суару арқылы өсіріп, қайта өңдеу;
- теріні қайта өңдеу негізінде жемдік қоспа өндіру;
- қойма логистикасын дамыту;
- қонақүй кешендерін салу.
Жоба толық жүзеге асқанда мыңнан астам жаңа жұмыс орны құрылады.
Бұл бастамалардың барлығы облыстың әлеуметтік-экономикалық дамуына серпін береді. Жаңа өндіріс іске қосылып, жаңа жұмыс орындары ашылады. Әкімдік барлық деңгейде қолдау көрсетуге дайын, – деді өңір басшысы Берік Уәли.
2025 жылдың басынан бері өңірде жүзеге асырылып жатқан инвестициялық жобалар саны 29-дан 97-ге дейін өскен. Тартылған инвестиция көлемі 2,2 трлн теңгеден 3,5 трлн теңгеге жетті. Оның ішінде 50 жоба Ұлттық цифрлық инвестициялық платформаға енгізілген.
