Семейдегі жедел медициналық жәрдем ауруханасының материалдық-техникалық базасы жаңартылды. Облыс әкімі Берік Уәли медициналық мекемеге барып, жаңа жабдықтардың жұмысымен және аурухана бөлімдерінің қызметімен танысты, деп хабарлайды Tura18.kz.
Ауруханада ангиографиялық операциялар жасайтын жаңа заманауи зал іске қосылды. Мұнда халықаралық стандарттарға сай «Philips Azurion 5 M20» аппараты орнатылған. Бұл құрылғы инсульттің ишемиялық және геморрагиялық түрлері, сондай-ақ миокард инфарктісі сияқты аса күрделі диагноздар кезінде жоғары дәлдікпен хирургиялық араласу жасауға мүмкіндік береді.
Жобаны кезең-кезеңімен жүзеге асыру нәтижесінде гибридті операциялық блок толық жабдықталған. Енді бір бөлімде екі ангиографиялық жүйе қатар жұмыс істей алады. Мамандардың айтуынша, бұл шұғыл жағдайдағы пациенттерге жедел әрі сапалы медициналық көмек көрсетуге айтарлықтай ықпал етеді.
Аурухана бас дәрігері Ерсін Сәбитов жаңа жабдықтың маңызын атап өтті.
Мұндай заманауи ангиограф біздің облыста бұрын болмаған. Өңірлік бюджет есебінен алынған бұл жоғары технологиялы құрылғы жедел медициналық көмек сапасын арттыруға мүмкіндік береді, – деді ол.
Облыс әкімі аурухана базасындағы «Диабет мектебінің» жұмысымен де танысты. Бағдарлама қант диабетімен ауыратын науқастар мен олардың туыстарына арналған. Мұнда пациенттерге ауруды бақылау, дұрыс тамақтану, дәрі-дәрмекті дұрыс қолдану және асқынулардың алдын алу бойынша жүйелі білім беріледі.
Сондай-ақ Берік Уәли пациенттерді қолдау орталығында, гематология бөлімшесінде болып, дәрігерлермен пікір алмасты. Ол зертханалық жұмыстарға арналған заманауи құрылғылардың, соның ішінде ламинарлы шкафтың жұмысын көрді. Бұл жабдық зерттеу жүргізу кезінде стерильді ортаны қамтамасыз етіп, медициналық талдаулардың сапасын арттыруға мүмкіндік береді.
Аурухана ғимаратындағы шатырды күрделі жөндеу жұмыстары да назарға алынды. Қазіргі таңда жөндеу жұмыстарының 60 пайызы аяқталған. Аймақ басшысы мердігер ұйымдарға жұмысты сапалы әрі белгіленген мерзімде аяқтауды тапсырды.
Көпбейінді стационар ретінде жұмыс істейтін бұл аурухана 375 төсек-орынға арналған. Мұнда тәулік бойы шұғыл медициналық көмек көрсетіледі. Құрылымында инсульт орталығы, кардиология, нейрохирургия, эндокринология, гематология және басқа да маңызды бөлімшелер бар.
Мекемеде 1024 қызметкер еңбек етеді, оның ішінде 149 дәрігер және 433 орта буын медицина қызметкері бар. Жыл сайын мұнда шамамен 39 мың науқас қабылданып, 18 мыңға жуық адам стационарлық ем алады. Сонымен қатар 12 операциялық зал жұмыс істеп, жылына 9 мыңға жуық күрделі ота жасалады.
Жұмыс сапары барысында облыс әкімі өңірдің денсаулық сақтау жүйесін жаңғырту бағытындағы жұмыстардың жалғасатынын атап өтті.
Жыл басында Семей қаласындағы жедел жәрдем стансасына 10 санитарлық автокөліктің кілтін табыстадық. Былтыр 100 санитарлық көлік сатып алынды, оның басым бөлігі жедел жәрдем стансасы мен аудандық медициналық ұйымдарға бөлінді. Биыл қыркүйекке дейін бұл көліктер толық жеткізіледі. Жалпы, 2025 жылы денсаулық сақтау саласының материалдық-техникалық базасын жаңартуға 6,5 млрд теңгеден астам қаржы бөлінді. Бұл бағыттағы жұмыс алдағы уақытта да жалғасады, – деді Берік Уәли.
Жалпы алғанда, аурухананың жаңғыртылуы өңір тұрғындарына көрсетілетін жедел және жоғары технологиялы медициналық көмектің сапасын арттыруға бағытталған маңызды қадам болып отыр.
