Көкпекті ауданының әлеуметтік-экономикалық дамуына үлес қосуға ниетті азаматтардың қатары жылдан-жылға артып келеді. Соның бірі – кәсіпкер, білім саласының маманы Камшат Абуғалиева. Өткен айда ол аудан әкімі Нұрбек Тұрсынханұлымен кездесіп, Көкпекті өңірінде іске асырылатын бірқатар маңызды жобаны талқылаған, деп хабарлайды Tura18.kz.
Кездесу барысында Камшат Сағдатқызы ауданға инвестор ретінде қолдау көрсетіп, жаңадан салынған балабақшаның жұмысына заманауи басқару жүйесін енгізу жөнінде ұсыныстарын жеткізді. Бұл бастама мектепке дейінгі білім беру сапасын арттырып, балабақша қызметін тиімді ұйымдастыруға мүмкіндік береді.
Сонымен қатар кәсіпкер ауданның әлеуметтік саласын дамытуға бағытталған жобаларға да атсалысуға дайын екенін білдірді.
Абуғалиева Камшат Сағдатқызы – білім мен іскерлікті қатар ұштастырған тәжірибелі маман. Ол математика ғылымы бойынша магистр және PhD (философия докторы) ғылыми дәрежесінің иегері. Халықаралық «Болашақ» бағдарламасының жеңімпазы атанып, АҚШ-тың Хьюстон қаласындағы Солтүстік Америка университетінен білім алуға ұсыныс (оффер) алған.
Қоғамдық және кәсіби салада да белсенділік танытып жүрген Камшат Сағдатқызы — облыстық іскер әйелдер кеңесінің мүшесі. 2023 жылы өткен республикалық педагогтер съезіне делегат ретінде қатысып, білім беру саласындағы өзекті мәселелер мен жаңа бағыттарды талқылауға үлес қосты.
Бүгінде ол бірнеше жекеменшік балабақшаның құрылтайшысы ретінде мектепке дейінгі білім беру жүйесін дамытуға үлес қосып келеді. Оның бұл тәжірибесі Көкпекті ауданында да тиімді жобалардың жүзеге асуына септігін тигізеді деген сенім бар.
Кәсіпкердің ауданға инвестиция салуға деген ниеті мен әлеуметтік маңызы бар жобаларды қолға алуы – Көкпектінің дамуына жасалған тағы бір игі қадам. Мұндай бастамалар өңірдің білім беру саласын жаңғыртып, болашақ ұрпақтың сапалы тәрбие мен білім алуына жол ашары сөзсіз.
Фархат Маратұлы
