Көкпекті ауданында медицина инфрақұрылымын дамыту бағытындағы жұмыстар жүйелі түрде жүзеге асырылып жатыр. Жуықта аудан орталығында «DentRise» заманауи стоматологиялық клиникасы пайдалануға берілді, деп хабарлайды Tura18.kz.
Аталған медицина нысаны жергілікті тіс дәрігері Өмірбек Ақтаевтың бастамасымен салынған. Жоба бірнеше жыл бойы жоспарланып, кезең-кезеңімен іске асырылды. Клиниканың басты мақсаты – аудан тұрғындарын сапалы әрі қолжетімді стоматологиялық қызметпен қамтамасыз ету.
«DentRise» клиникасында стоматологиялық көмектің 5 негізгі бағыты бойынша қызмет көрсетіледі. Атап айтқанда, терапиялық стоматология, хирургиялық стоматология, балалар стоматологиясы, ортопедиялық бөлім (тіс протездеу) және орталықтандырылған стерилизация бөлімі жұмыс істейді.
Заманауи медициналық құрал-жабдықтармен толықтай жабдықталған клиника тұрғындарға тіс емдеу, протездеу және хирургиялық қызметтерді ауданнан шықпай-ақ алуға мүмкіндік береді. Бұл бастама өңірдің денсаулық сақтау саласын дамытуға және халықтың медициналық қызметке қолжетімділігін арттыруға бағытталған маңызды қадам болып табылады.
