Биылғы 12 шілдеде Көкпекті ауданында Ұлы Абайдың 180 жылдығына арналған «Көркейген өлке – Көкпекті» спорт және мәдениет фестивалі өтеді, деп хабарлайды Tura18.kz.
Республикалық деңгейде өтетін іс-шараның жүзеге асуына мұрындық болған – «Көкпекті» ауыл шаруашылық қоры. Бұл айтулы фестиваль киелі Көкпекті өңіріндегі ауылшаруашылық құрылымдары басшыларының, елжанды азаматтар мен жомарт жүрек кәсіпкерлердің туған жерге қызмет етуінің жарқын үлгісі болмақ.
Фестиваль бағдарламасында 80 шақырымдық ұлы аламан, тай жарысы, топ бәйге және аламан бәйге, командалық көкпар ойындары бар.
Абай атындағы Семей мемлекеттік театрының ұлы Абайдың 180 жылдығына арналған қойылымы көпшілік назарына ұсынылады. Аудан халқына көтеріңкі көңіл-күй сыйлау мақсатында Қазақстан эстрада жұлдыздарының қатысуымен мерекелік гала концерт өтеді.
«Көркейген өлке – Көкпекті» спорт және мәдениет фестивалі аудан халқының рухын асқақтатып, өнер мен спортқа деген құлшынысын арттырып, мәдениетін жаңғыртады деген сенімдеміз. Қадірменді жерлестер, береке-бірлігімізді нығайтып, спорт пен өнерімізді өркендетіп, ұлттық дәстүрімізді бірге ұлықтайық, – деді Көкпекті ауданының әкімі Әділет Қожанбаев.
Қайрат Қасымбек
