Абай облысының Көкпекті ауданында «Үлгілі ауыл» байқауының жеңімпазы мен жүлдегерлері анықталып, қомақты ақшалай сыйлыққа ие болды, деп хабарлайды Tura18.kz.
Биылғы маусым айында аудан әкімінің өкіміммен байқаудың ережесі мен жұмыс тобы бекітіліп, барлық ауылдық округтерге арнайы сапарлар ұйымдастырылды. Бағалау келесі бағыттар бойынша жүргізілді:
Көшет егу және олардың күтімі;
Мекеме, дүкен, тұрғын үйлер мен қоршаулардың көрінісі, түнгі жарықтандыру;
Жолдардың сапасы мен көше тазалығы;
Көшелерді жарықтандыру;
Шағын сәулет нысандар мен демалыс алаңдарының жағдайы;
Қоқыс полигондары мен тұрмыстық қалдықтарды шығару тәртібі;
Көше бойындағы бағаналар мен үгіт-насихат материалдарының көрінісі.
Екі айдан астам уақытқа созылған байқаудың негізгі мақсаты – ауылдық елді мекендердегі абаттандыру, көгалдандыру, көріктендіру жұмыстарын насихаттау, экологиялық мәдениетті қалыптастыру. Нәтижесінде ауданның барлық ауылдары байқауға қатысып, үздік шыққандары ақшалай сыйлыққа ие болды. Бұл игі бастама алдағы уақытта да дәстүрлі түрде жалғасады. Келер жылы «Үлгілі көше», «Үлгілі аула» және «Үлгілі мекеме» аталымдары қосылады. – деп атап өтті Көкпекті ауданының әкімі Әділет Қожанбаев.
Айта кетейік, биылғы байқауға Көкпекті ауылдық округі қатыстырылған жоқ.
Сонымен аудандық жұмыс тобының шығарған қорытындысына сәйкес, үшінші орынды Қойгелді Аухадиев атындағы ауылдық округі жеңіп алып, 5 млн теңгенің сертификатын иеленді. Жүлделі екінші орын Тассай ауылдық округіне бұйырды, ақшалай сыйлық – 10 млн теңге. Ал осы байқаудың бас бәйгесі мен 20 млн теңге ақшалай сыйлықты Теректі ауылдық округі иеленді. Келер жылы Көкпектіде миллионер ауылдардың қатары бұдан да көбейе түседі деген сенім мол.
