Абай облысы білім басқармасының басшысы Бауыржан Ердембеков Көкпекті ауданына іс-сапары аясында Оқушылар шығармашылық сарайының жұмысымен танысты, деп хабарлайды Tura18.kz.
Мекеме қызметі туралы директордың оқу ісі жөніндегі орынбасары Назым Жұмабекқызы баяндап, оқушылар шығармашылық сарайының тарихына шолу жасады.
Қазіргі таңда оқушылар шығармашылық сарайында 5 бағыт бойынша 60 үйірме жұмыс істейді. 52 педагогтың жетекшілігімен 1080 бала қосымша біліммен қамтылған:
— Музыкалық-эстетикалық бағыт – 19 үйірме / 305 бала
— Көркем-эстетикалық – 12 үйірме / 299 бала
— Әлеуметтік-педагогикалық – 15 үйірме / 256 бала
— Спорт-туризм – 12 үйірме / 198 бала
— Техникалық – 2 үйірме / 22 бала
Оқушылар шығармашылық сарайы аудан орталығындағы ғана емес, шалғай ауылдардағы балалардың да шығармашылығын дамытуда. Бүгінгі таңда Үлгілімалшы, Тассай, Көкжайық, Қарамойыл, Биғаш, Теректі, Шәріптоғай, Үлкенбөкен ауылдарында 8 филиал жұмыс істейді. Онда 19 үйірмеде 361 оқушы білім алуда, 32 педагог қызмет етеді.
Ғимаратта 15 оқу кабинеті бар. Материалдық-техникалық база толықтай жабдықталған: заманауи талаптарға сай робототехника кабинеті, шеберхана, акт залы қарастырылған.
Кездесу барысында әр үйірменің жетістіктері таныстырылып, педагогтардың кәсіби біліктілігі мен ұжымның сапалық құрамы жайлы мағлұмат берілді.
Соңғы бір жылдағы айтулы жетістіктердің бірі – Абай облысының әкімі Берік Уәли мырзаның тапсырмасына сәйкес ұйымдастырылған ауқымды облыстық қосымша білім беру мекемелеріне арналған семинар. Бұл шараға өңірдің түкпір-түкпірінен қосымша білім беру мекемелерінің педагогтары мен басшылары қатысып, Көкпекті ауданындағы оқушылар шығармашылық сарайының озық тәжірибесімен танысты.
Бүгінде мекеме жұмысы облыстық қана емес, республикалық деңгейде де үлгі ретінде насихатталуда.
