Көкпекті ауданынан шыққан жас жауынгер Аршын Кенейұлы аралас жекпе-жектен ARB SEMEY лигасының чемпиондық белбеуін жеңіп алып, өз шеберлігін дәлелдеді, деп хабарлайды Tura18.kz.
Бұл жеңіс – оның ұзақ уақыт бойы төккен тері мен тынымсыз еңбегінің нәтижесі. Аршынның жеңісі тек оның емес, бүкіл Көкпекті ауданының мақтанышы екені сөзсіз.
Аршынның әкесі Кеней Зейноллаұлы біраз жылдан бері мәдениет саласында жемісті еңбек етіп келе жатыр. Ол Қ.Алтынбаев атындағы мәдениет үйінде өнерпаз ретінде жұмыс істейді. Отбасы үшін бұл жеңіс үлкен қуаныш, себебі Аршынның табысқа жету жолында жақындары оған әрқашан қолдау көрсетеді.
ARB SEMEY лигасы – еліміздегі аралас жекпе-жек бәсекелерінің ішіндегі беделді турнирлердің бірі. Лигада еліміздің үздік спортшылары бақ сынайды, ал жеңімпаздар үлкен құрмет пен қошеметке ие болады. Бұл лиганың спортшыларға жоғары деңгейдегі бәсекелестік пен кәсіби даму мүмкіндігін беретіндігімен ерекшеленеді.
Фархат Маратұлы
