Абай облысы Көкпекті ауданының Ж.Шайжүнісов атындағы орта мектеп мұғалімі, «Болашақ» бағдарламасының түлегі Нұрлан Құмаров күнделікті сабақта халықаралық тәжірибені қолданады. Оның бұл қадамы әріптестері тарапынан жоғары бағаланып, шәкірттерінің қызығушылығын арттыра түсті, деп хабарлайды Tura18.kz.
Нұрлан өзінің туған ауылындағы Шайжүнісов мектебінде қызмет атқарады. Жас маман 5, 8 және 10-сыныптарға математикадан сабақ береді. Ол саралап оқыту әдісін, зерттеу тәсілі мен жасанды интеллектке негізделген бейімделген оқыту платформаларын (DreamBox, Khan Academy, GeoGebra, Mathspace, ASSISTments, Zearn т.б.) тиімді қолданып, оқушылардың білім сапасын арттыруға, пәнге қызығушылығын күшейтуге басымдық беріп жүр.
Ауыл мектебінде де әлемдік білім тәжірибелерін қолдануға болады. Менің мақсатым – әр оқушының әлеуетін ашу, білімін тереңдету және заманауи әдістер арқылы олардың болашаққа нық қадам басуына жағдай жасау, – деді жас педагог.
Нұрлан Құмаров «Болашақ» халықаралық бағдарламасы аясында Мәскеудегі Ұлттық зерттеу университеті «Жоғары экономика мектебі» білім институтында магистратураны тәмамдап, эмоционалдық бұзылыстары бар оқушыларға қолайлы орта қалыптастыруға арналған ғылыми жұмыс қорғаған. Бағдарлама барысында Мәскеудегі мектепте орыс тілінде математикадан сабақ беріп, екі жыл тәжірибе жинады.
Сонымен қатар ол дарынды балаларды олимпиадаларға дайындап қана қоймай, өз білімін үздіксіз жетілдіруді басты мақсатының бірі деп санайды.
Айта кетейік, бейімделген оқыту (Adaptive learning) – оқушының жеке қабілеті мен қарқынына қарай оқу материалын іріктейтін заманауи әдіс. Бұл тәсіл дәстүрлі сабақ пен онлайн платформаларды үйлестіре отырып, білімді тиімді меңгеруге мүмкіндік береді.
