Көкпекті ауданының әкімі Әділет Қожанбаев «Мектепке жол» акциясын ұйымдастырудың мәні мен тәсілдеріне ерекше тоқталды. Оның айтуынша, қайырымдылықпен алынған сөмке, дәптер немесе басқа да оқу құралдарын балаларға жария түрде табыстап, суретке түсіру дұрыс емес, деп хабарлайды Tura18.kz.
Суретті көріп алған сыныптастары балаға «сен мына сөмкені қайырымдылықпен алдың ғой» деп кемсітіп, мазақ қылып айтуы мүмкін.
Бұл – ең үлкен буллингтің бастауы, – деді аудан басшысы. Ол есеп берудің басқа жолын қарастыруды тапсырды.
Әкімнің айтуынша, басты мақсат – әлеуметтік жағынан аз қамтылған отбасылардың балаларына қолдау көрсету, бірақ ол қолдау олардың намысына тимеуге тиіс. «Мектепке жол» – бүкілқазақстандық қайырымдылық акциясы, сондықтан оның шынайы рухы – ізгілік пен мейірімділікті үнсіз жеткізе білу.
Әмір Бек
