Көкпекті орта мектебінде “Мектеп оқушыларына әскери-патриоттық тәрбие берудің маңызы» атты облыстық семинар-практикум өтті. Онда өскелең ұрпаққа әскери-патриоттық тәрбие берудің өзекті мәселелері талқыланды, деп хабарлайды Tura18.kz.
Маңызды іс-шараға Абай облысының әр ауданынан әскери-патриоттық клубтардың 50-ге жуық жетекшісі арнайы келіп қатысты.
Абай облыстық «Дарын» орталығы әскери-патриоттық бағытты дамыту бөлімінің басшысы Болат Құрманов семинардың маңызы жоғары екенін атап өтті.
Көкпекті орта мектебінің информатика пәні мұғалімі Бақытбек Орынбаев алғашқы әскери даярлық сабағы пен робот техника пәнін интеграциялап, оқушыларды әскери және техникалық жағынан заманға сай дамытатын озық әдістерді көрсетті. Қазіргі заманда бұл дағдылардың өте маңызды екені айтпаса да түсінікті.
Көкпекті орта мектебінің Л.Фахруддинов атындағы «Жас сарбаз» әскери-патриоттық клубының белсенділігі іс-шараға жалын қосты. Клубты 2004 жылы Бекболат Рахимов ашса, 2019 жылдан бері оған Ержан Ғабитханов жетекшілік етіп жүр.
Мектеп басшысы Нартай Советханұлы сөйлеген сөзінде патриоттық клуб мүшелерінің жан-жақты белсенділігіне жоғары баға берді.
Семинар соңында қонақтар Көкпектідегі Сейітбаттал Жүнісбайұлы атындағы әскери-патриоттық орталыққа бас сұқты. Орталықтың тыныс-тіршілігімен танысып, өзара аз-кем кеңесіп, алдағы бағыттарын айқындады.
Мұндай ауқымды іс-шара ауданда жиі өтпейді. Мұнда әр орталық жетекшісі өз жұмысының сапасын арттыруға қажетті дүниені ала білгені анық.
