Абай облысының әкімі Берік Уәли жұмыс сапары аясында Семей қаласындағы бірқатар өндірістік кәсіпорынды аралап, олардың қызметімен танысты. Сапар барысында өңірдегі өнеркәсіп әлеуеті мен өндірістің даму қарқынына ерекше назар аударылды, деп хабарлайды Tura18.kz.
Аймақ басшысы алдымен «KONDIZ» ЖШС-не барды. 2013 жылы құрылған кондитерлік фабрика бүгінде еліміздегі қарқынды дамып келе жатқан жас кәсіпорындардың бірі саналады. Мұнда 200-ден астам адам тұрақты жұмыспен қамтылған.
Кәсіпорынның негізгі бағыты – кондитерлік және макарон өнімдерін өндіру. Жылдық өндірістік қуаты 22 мың тоннаны құрайды. Қазіргі таңда зауытта печеньенің 100-ден астам түрі шығарылады. Өнімдер Қазақстан нарығымен қатар Қырғызстан, Ресей, Моңғолия, Грузия және Қытай елдеріне экспортталып отыр.
Кәсіпорын жұмысымен танысқан облыс әкімі оның өндірістік әлеуетін жоғары бағалап, жергілікті билік тарапынан қолдау жалғасатынын жеткізді.
Сапар барысында Берік Уәли «Alina Group» ЖШС-нің Семейдегі филиалында да болды. Бұл – құрылыс индустриясында жетекші орын алатын отандық холдингтердің бірі. Кәсіпорын өңірді құрғақ құрылыс қоспалары және әрлеу материалдарымен қамтамасыз етеді.
2004 жылы негізі қаланған өндіріс орнында бүгінде 398 адам еңбек етеді. Кәсіпорынның айлық өндірістік қуаты 24 мың тонна дайын өнім шығаруға мүмкіндік береді, ал шикізатты өңдеу көлемі айына 10 мың тоннаны құрайды.
Аймақ басшысы өндіріс алаңын аралап, кәсіпорынның технологиялық мүмкіндіктерімен танысты. Сонымен қатар мұндай өндіріс орындарының өңір экономикасын дамытудағы рөлі зор екенін атап өтті.
Жалпы, жұмыс сапары барысында облыс әкімі өнеркәсіп саласының дамуы, жаңа жұмыс орындарының ашылуы және экспорттық әлеуетті арттыру мәселелеріне баса мән берді.
