Мемлекет басшысы Қасым-Жомарт Тоқаев Абай облысының әкімі Берік Уәлиді қабылдап, өңірдің әлеуметтік-экономикалық даму көрсеткіштерімен танысты, деп хабарлайды Tura18.kz.
Кездесу барысында облыс әкімі Президентке 2025 жылғы әлеуметтік-экономикалық даму қорытындылары мен биылғы қаңтар-сәуір айларындағы негізгі көрсеткіштер туралы есеп берді.
Аймақ басшысының айтуынша, былтыр Абай облысының өңірлік жалпы өнімі 3,9 триллион теңгеге жеткен. Ал биылғы төрт айдың қорытындысы бойынша қысқа мерзімді экономикалық индикатор 103,8 пайыз болды. Өңірге тартылған инвестиция көлемі 19,4 пайызға артып, өнеркәсіп, өңдеу секторы, ауыл шаруашылығы, құрылыс және көлік салаларында оң өсім сақталған.
Облыс әкімі инвестициялық жобаларды жүзеге асыру бағытында атқарылып жатқан жұмыстарға да тоқталды. Оның мәліметінше, былтырдан бері өңірдің инвестициялық пулына енгізілген жобалар саны 29-дан 112-ге дейін көбейген. Нәтижесінде жоспарланған инвестиция көлемі 2,2 триллион теңгеден 4,4 триллион теңгеге дейін ұлғайған.
Қазіргі уақытта облыста бірқатар ірі инвестициялық жоба жүзеге асырылып жатыр. Атап айтқанда, құны 577,5 миллиард теңге болатын Аягөз – Бақты теміржол желісінің құрылысы жүргізіліп жатыр. Сонымен қатар Семей қаласында құны 714 миллиард теңге болатын жаңа жылу электр орталығын және жалпы инвестиция көлемі 255 миллиард теңгеден асатын тау-кен байыту комбинатын салу жобалары қолға алынған.
Кездесуде Семей қаласында арнайы экономикалық аймақ құру мәселесі де талқыланды. Жоспар бойынша аталған аймақта жалпы құны 400 миллиард теңгенің өндірістік жобалары іске асырылып, 2500 жаңа жұмыс орны ашылмақ. Қазір үш ірі жоба бойынша ұсыныстар келіп түскен.
Берік Уәли Мемлекет басшысына Алакөл туристік аймағын дамыту жұмыстары жөнінде де баяндады. Биыл жағалау инфрақұрылымын жаңғыртуға 15,4 миллиард теңге бөлінген. Оның ішінде электр желілерін жүргізу мен Үржар әуежайының терминалын қайта жаңғыртуға Арнаулы мемлекеттік қордан 11,6 миллиард теңге қарастырылған.
Сондай-ақ өңірдегі инженерлік инфрақұрылымды жаңғырту бағытында жүзеге асырылып жатқан жобалар таныстырылды. Олар сумен жабдықтау, кәріз және жылу желілерін жаңарту, Семей қаласындағы жаңа көпір құрылысын аяқтау, тұрғын үй құрылысы мен жол инфрақұрылымын дамыту жұмыстарын қамтиды.
Кездесу қорытындысында Мемлекет басшысы өңірге инвестиция тарту жұмыстарын күшейту, экономиканы әртараптандыру, инфрақұрылымды жаңғырту, халықтың тұрмыс сапасын арттыру және «Абайға құрмет» акциясын жоғары деңгейде өткізуді қамтамасыз ету жөнінде бірқатар нақты тапсырма берді.
