Абай облысының орталығында 25 мың орындық жаңа стадионның құрылысы басталды. Аймақ басшысы Берік Уәли Smart City ықшам ауданындағы құрылыс алаңына барып, жұмыс барысымен танысты, деп хабарлайды Tura18.kz.
«Туған жерге туыңды тік» инвестициялық форумы аясында Семей қаласы әкімдігі мен KAZ Minerals ЖШС арасында жасалған меморандумға сәйкес, 20 гектар аумақта 25 мың көрерменге арналған стадион салынады. Қазір мердігер ұйыммен үш жақты келісімшарт бекітіліп, аумақ қоршалып, жер қазу және тегістеу жұмыстары басталды.
Жоба бойынша жолдар мен алаңдар салынып, өңірдің табиғи-климаттық ерекшеліктері толық ескерілген. Құрылыс 2 жыл ішінде аяқталмақ.
Бұл – семейліктердің көптен күткен жобасы. Семей – қазақ футболының отаны. Жаңа стадион УЕФА стандарттарына сай болады. Жұмысты бәсеңдетпей жалғастыру қажет, қаржы кезең-кезеңімен бөлінеді, – деді облыс әкімі Берік Уәли.
