Биылғы 12 қазанда Семейде алғаш рет қала әкімін тікелей сайлау өтті. Мұндай саяси науқан еліміздің тарихында тұңғыш рет болып тұр, деп хабарлайды Tura18.kz.
Абай облысының орталығында сайлау учаскелері таңғы сағат 7.00-де ашылып, сайлаушыларды қабылдады. Қалада барлығы 129 сайлау комиссиясы ұйымдастырылды, оның ішінде бір аумақтық, 128 учаскелік комиссия жұмыс істеді. Сайлаушылар саны – 220 761 адам. Дауыс берушілерге қолайлы жағдай жасалды. Мүгедектігі бар азаматтарға пандустар, тактильді бағыттағыштар, сондай-ақ еріктілер көмегі ұйымдастырылды. Жастардың белсенділігі байқалды. Олардың көпшілігі алғаш рет дауыс беріп, өз қаласының болашағын айқындауға қатысудың маңызын атап өтті.
Сайлау барысын саяси партиялар, қоғамдық бірлестіктер мен тәуелсіз бақылаушылар қадағалады. Олардың айтуынша, дауыс беру қолданыстағы заңнама талаптарына сәйкес өтті, ал ашықтық пен жариялылық жоғары деңгейде қамтамасыз етілді.
Семей қаласында өткен бұл сайлау елімізде азаматтардың ел өміріне белсенді қатысуының айқын үлгісіне айналды. Семейліктер өз ұстанымдарын білдіріп, өзгеріс пен дамуға деген ортақ ниетін көрсетті.
Абай облысының әкімі Берік Уәли көппен бірге Медициналық университетте орналасқан №93 сайлау учаскесіне барып, өз таңдауын жасады.
Бүгін – Семей қаласы тарихындағы ерекше күн. Қала тұрғындары тұңғыш рет өз әкімін тікелей дауыс беру арқылы сайлайтын болады. Бұл – Мемлекет басшысы Қасым-Жомарт Тоқаев бастамашы болған саяси реформалардың нақты жүзеге асуының айқын көрінісі. Президенттің «Халық үніне құлақ асатын мемлекет» тұжырымдамасы мен басқару жүйесін демократияландыру бағытындағы жаңа қадамдар бүгінде нақты іс жүзінде көрініс тауып келеді. Семейліктер, соның ішінде жастар мен аға буын өкілдері таңертеңнен бері сайлау учаскелеріне келіп, азаматтық белсенділік танытып жатыр. Бұл – елдегі саяси мәдениеттің өсіп келе жатқанын, халықтың өз қаласының тағдырына бей-жай қарамай, жауапкершілікпен қарай бастағанын көрсетеді. Облыс орталығының әкімін тікелей сайлау – тұрғындар мен мен жергілікті билік арасындағы сенімді нығайтатын жаңа дәуірдің бастауы, – деді ол.
