Абай облысының әкімі Берік Уәлидің қолдауымен Семейдің бірқатар қоғамдық орнында заманауи Freedom Wi-Fi тегін интернет желісі орнатылып жатыр, деп хабарлайды Tura18.kz.
Жобаны Freedom Telecom компаниясы жүзеге асырып жатыр. Жаңа буындағы Wi-Fi 7 (IEEE 802.11be) технологиясына негізделген желі қала тұрғындары мен қонақтарының цифрлық қолжетімділігін арттыруға бағытталған. Қазір тегін Wi-Fi келесі аумақтарда қосылған: Арбат, Орталық парк, Орталық алаң, Әуезов атындағы алаң, Жамақаев көшесіндегі саябақ.
Жоба аясында 38 жерде сымсыз интернет байланысы қосылады және оның жылдамдығы 1 Гбит/с дейін жетеді. Желі бір мезетте 5 мыңға жуық пайдаланушыны тұрақты байланыспен қамтуға мүмкіндік береді. Freedom Wi-Fi жаппай іс-шаралар кезінде де жоғары сапалы интернет қолжетімділігін қамтамасыз етіп, қалалық цифрлық инфрақұрылымды дамытуға үлес қосуда.
