Семейде Абай облысы әкімінің жүлдесіне арналған халық спорт ойындарының шымылдығы түрілді. Дүбірлі бәсекеде өңірдің қала-аудандарынан келген сайыпқыран саңлақтар спорттың 10 түрінен өзара мықтыны анықтап жатыр, деп хабарлайды Tura18.kz.
Жарыс барысында қатысушылар Президенттік көпсайыс, шағын футбол, волейбол, үстел теннисі, арқан тарту, тоғызқұмалақ, күрес, гір көтеру, қол күресі сияқты командалық және жеке сайыс түрлерінен бақ сынайды.
Дәстүрлі турнирдің негізгі мақсаты – бұқаралық спортты дамыту, салауатты өмір салтын насихаттау және жастар арасындағы достық пен бірлікті нығайту.
Биылғы халық спорт ойындарына облыстың екі қаласы мен 10 ауданынан құралған командалар қатысып отыр. Ұйымдастырушылардың айтуынша, мұндай жарыстар өңірдегі спорттың дамуына серпін беріп, тұрғындардың спортқа деген қызығушылығын арттыруға ықпал етеді.
