Семейде Президент тапсырмасы бойынша Оқушылар сарайы салынып жатыр. Құрылыс жұмыстарын Абай облысының әкімі Берік Уәли тексерді, деп хабарлайды Tura18.kz.
Семейде құрылысы жүріп жатқан балалар мен жастардың жан-жақты дамуына үлес қосатын көпфункционалды орталық, яғни Оқушылар сарайының құрылыс жұмыстары аяқталуға жақын. Салынып жатқан ғимараттың жалпы аумағы – 2,1 га, ал ауданы – 9 800 шаршы метр. Оқушылар сарайы бір мезгілде 500 адамды қабылдай алады.
Жобаға сәйкес Оқушылар сарайы ғылыми-техникалық, көркем-эстетикалық, спорттық-сауықтыру, гуманитарлық, психологиялық, тарихи-өлкетану сынды алты негізгі бағытқа бөлінген. Осы бағыттарда робототехника, бағдарламалау, шығармашылық студиялар, театр және музыка үйірмелері, денешынықтыру және спорт, білім беру курстары, әдебиет және тіл, тұлғалық даму, өңір арихы мен мәдениет зерттеу бойынша алаңдар жұмыс жасайтын болады. Әр бөлім өз тақырыбына сәйкес жабдықталады.
Оқушылар сарайы – Мемлекет басшысының Абай облысын қайтадан құрғаннан кейінгі салынып жатқан бірінші ғимарат. Орталықтың тезірек ашылғанын тұрғындар, оқушылар мен ата-аналар күтіп отыр. Нысан қаланың ортасында орналасқан. Айналма жолдың қай жағынан келсеңіз де көрінеді. Ішінде әртүрлі үйірмелер орналасады. Семейдің оқушыларына таптырмайтын орталық болайын деп тұр. Тиісті қаржы бөлінді, Үкімет қолдап отыр. Сондықтан Президент тапсырмасымен салынып жатқан нысанның құрылысын сапалы, уақтылы аяқтауымыз керек, — деді облыс әкімі.
