Семей қаласында «Таза Қазақстан» бағдарламасы аясында экологиялық бағыттағы дәріс өтіп, студенттерге табиғатты қорғау мәдениетін қалыптастыруға арналған ақпарат берілді. Шараға «Семей орманы» табиғи резерватінің мамандары қатысып, орманды қалпына келтіру, экологиялық қауіптердің алдын алу және табиғатты жауапкершілікпен пайдаланудың маңызы туралы айтты, деп хабарлайды Tura18.kz.
Дәріске 150-ден астам студент қатысып, мамандармен ашық пікір алмасуға мүмкіндік алды. Оқушылар орман экожүйесін күтіп-баптау, заманауи экожобалар және орман шаруашылығы саласындағы кәсіби қызмет туралы сұрақтарын қойды.
«Семей орманы» резерватінің орман өсіру инженері Айдана Сабыржан өңірде атқарылып жатқан жұмыстар туралы баяндады. Оның айтуынша, резерват «Таза Қазақстан» бастамасы бойынша ағаш отырғызу, құстарға ұя орнату және аумақтарды тазарту сияқты кең көлемді экологиялық шараларды жүргізіп келеді.
2025 жылға жоспарланған жұмыстар аясында резерват аумағында:
• көктемде 4 810 га жерге ашық тамырлы қарағай көшеттері;
• күзде 475 га аумаққа жабық тамырлы көшеттер отырғызылды.
Бір жылдың өзінде 2 миллионнан астам ағаш егілген. 2021–2027 жылдарға арналған бағдарлама шеңберінде резерватта қазіргі уақытта 21 мың гектарға 100 миллионнан аса ағаш отырғызылған.
«Бұл – бір реттік акция емес, табиғатты қорғауға бағытталған ұзақ мерзімді мәдениет қалыптастыру», — деді Айдана Сабыржан.
Дәріске қатысқан «Орман шебері» мамандығының студенті Ақерке Талғат экология жайлы мамандардан тікелей ақпарат алу құнды тәжірибе болғанын атап өтті.
Колледж бен «Семей орманы» резерваті алдағы уақытта да бірлескен дәрістер, практикалық сабақтар және табиғатты қорғау шараларын жалғастыруды жоспарлап отыр.
Ұйымдастырушылардың айтуынша, мұндай кездесулер жастардың экологиялық мәдениетін арттырып, «Таза Қазақстан» бағдарламасының тиімді жүзеге асуына оң ықпал етеді.
