Семей қаласындағы облыстық тарихи-өлкетану музейінде «Ұлы дала үнісің сен, домбыра!» атты көрме ұйымдастырылды. Шараның басты мақсаты – ұлттық домбыра өнерін насихаттап, халықтың рухани мұрасын өскелең ұрпаққа таныстыру, деп хабарлайды Tura18.kz.
Көрмеде музей қорындағы белгілі өнер қайраткерлеріне тиесілі домбыралар ұсынылды. Келушілер тарихи тұлғалар пайдаланған аспаптармен танысып, олардың шығармашылық жолы мен мәдениеттегі рөлін зерделеу мүмкіндігіне ие болды. Экспозицияда домбыраның түрлі үлгілері мен күй өнеріндегі маңызы кеңінен көрсетілді.
Музей директоры Қайрат Сабырбаев бұл көрме ұлттық құндылықтарды насихаттауға арналған маңызды рухани шара екенін атап өтті. Ол домбыра тек музыкалық аспап емес, халықтың болмысы мен шежіресінің белгісі екенін айтты.
Көрмеге Сапарғали Әлімбетов, Тәңірберген Әміренов, Жәнібек Кәрменов, Болат Сыбанов, Мейрамбек Ахметов сынды өнер тарландары мен ақындардың, ғалымдардың және күйші-композиторлардың домбыралары қойылды.
