Абай облысының әкімі Берік Уәли қала аумағын аралау барысында бұрынғы «Пищевик» стадионы орналасқан аумаққа барып, сол жерде бой көтеретін жаңа спорт кешендерінің жобаларымен танысты, деп хабарлайды Tura18.kz.
Мемлекет басшысының қолдауымен Абайдың 180 жылдығына арналған «Абайға құрмет» акциясы аясында Ақтөбе облысы Абай облысына жекпе-жек сарайын сыйға тартпақ. Бұл нысан «Заря» шағын ауданында салынады. Сонымен қатар осы аумақта мұз сарайы да бой көтереді. Бұл қала тарихындағы алғашқы мұз аренасы болмақ.
Жекпе-жек сарайы үш қабаттан тұрады және бокс, күрес, дзюдо сынды спорт түрлерінен жарыстар өткізуге мүмкіндік береді.
Аймақ басшысы қала құрылысының бас жоспарға сәйкес жүзеге асатынын және сол жағалауды дамытуға ерекше назар аударылып жатқанын атап өтті. Ол бұл аумақта халық тығыз орналасқанын айтып, тұрғындар үшін әлеуметтік және спорттық нысандар салу маңызды екенін жеткізді.
Бұрынғы стадион орналасқан кең аумақ екі ірі спорт кешенін қатар салуға толық жеткілікті. Мұндай нысандар бұқаралық спортты дамытуға тың серпін береді, – деді Берік Уәли.
Сапар барысында облыс әкімі «Заря» шағын ауданындағы құрылыс алаңына барып, үйлерді күреу жұмыстары бас жоспар аясында жүргізіліп жатқанын айтты. Мемлекет мұқтажы үшін белгіленген жер телімдеріне қатысты Семей әкімдігінің тиісті қаулысы бар.
Қаңырап тұрған үйлер қоқыс алаңына айналмауға тиіс. Көшелерді де кеңейту қажет. Кейбір тұрғындар «үй сүрілген жерлер дұрыс пайдаланылмай жаты» деген пікірде. Бұл – қате түсінік. Бәрі жоспарға сай жүзеге асады, – деді облыс әкімі.
