Облыс әкімі Берік Уәлидің төрағалығымен өткен кеңейтілген аппараттық кеңесте Семейдегі сауда нысандарында тазалық пен санитарлық талаптардың сақталуы, сондай-ақ көктемгі әскери қызметке шақыру науқанының барысы қаралды, деп хабарлайды Tura18.kz.
Жиынға облыстық басқармалар мен департамент басшылары қатысып, аудан және қала әкімдері бейнебайланыс арқылы қосылды. Күн тәртібіндегі мәселелер бойынша жауапты сала жетекшілері баяндама жасады.
Өңірде сауда орындарын жаңғырту және оларды санитарлық әрі сәулеттік талаптарға сәйкестендіру жұмыстары жалғасуда. Қазіргі уақытта Семейдегі «СМОКК» базары жаңғырту жобасын әзірлесе, «Мереке» базарында дайындық кезеңі жүріп жатыр. Негізгі құрылыс жұмыстары биылғы жылдың екінші және үшінші тоқсандарына жоспарланған.
Сонымен қатар, «Таза Қазақстан» акциясы аясында 900-ден астам сауда және қызмет көрсету нысанына санитарлық талаптарды сақтау және ғимараттардың сыртқы келбетін ретке келтіру жөнінде ескертулер берілген. Талапқа сай келмейтін нысандарға кемшіліктерді белгіленген мерзімде жою тапсырылды.
Облыс әкімі Семей қаласының басшылығына барлық сауда нысандарын заң аясында толық тексеруден өткізіп, талап бұзған кәсіпкерлерге қатысты нақты шара қабылдауды тапсырды. Сондай-ақ базарларды жаңғырту бойынша Жол картасының орындалуын жеке бақылауға алуды міндеттеді.
Бұл жұмыстар тек ескертумен шектелмеуі тиіс. Әр нысан бойынша нақты нәтиже қажет. Негізгі мақсат — қаладағы барлық кәсіпкерлік нысандарында тазалық, қауіпсіздік және бірыңғай сәулеттік келбет қалыптастыру, — деді Берік Уәли.
Жиында бұдан бөлек көктемгі әскери қызметке шақыру науқаны да талқыланды. Аймақ басшысы бұл мемлекеттік маңызы бар міндет екенін атап өтіп, жауапты органдарға жастар арасында түсіндіру және патриоттық жұмыстарды күшейтуді тапсырды.
