Мемлекет басшысы Қасым-Жомарт Тоқаевтың тапсырмасына сәйкес Абай облысында халықты сапалы ауызсумен қамтамасыз ету жұмыстары жалғасып жатыр, деп хабарлайды Tura18.kz.
Бұл туралы облыс әкімі Берік Уәли Үкімет отырысында баяндап берді. Оның айтуынша, бүгінгі таңда өңірде тұрғындарды ауыз сумен қамту деңгейі 93,4%-ға жеткен, оның ішінде қалалық жерлерде – 94,2%, ауылдық аймақтарда – 93,1%.
Қазіргі уақытта облыстағы 320 ауылдық елді мекеннің 171-і орталықтандырылған сумен қамтылған. Сонымен қатар, 99 ауылда су тарту мақсатында блок-модульдер орнатылған, ал 24 елді мекен суды жергілікті су көздерінен алып отыр. Дегенмен, шамамен 39,4 мың тұрғын әлі де сапалы ауыз суға қол жеткізе алмай келеді.
Осы мәселені шешу мақсатында, Абай облысында жалпы құны 14,4 миллиард теңге болатын 37 жоба іске асырылып жатыр. Оның ішінде, құны 10,7 миллиард теңгені құрайтын 19 жоба Үкіметтің қолдауымен жүзеге асуда. Тағы үш жобаға 6,2 миллиард теңге көлемінде қаржы облыстық бюджеттен қарастырылған, соның 620 миллион теңгесі нақты бөлініп, құрылыс жұмыстары басталған. Қалған қаражатты бөлу бойынша келіссөздер салалық министрліктермен жалғасуда.
Берік Уәли осы жобалар толық іске қосылған жағдайда, облыс халқының ауыз суға деген қажеттілігі толығымен шешілетініне сенім білдірді.
