Көкпекті аудандық кітапханасында Президенттің «Жасанды интеллект дәуіріндегі Қазақстан: өзекті мәселелер және оны түбегейлі цифрлық өзгерістер арқылы шешу» атты Қазақстан халқына Жолдауы аясында аудан жастарының қатысуымен дөңгелек үстел отырысы өтті, деп хабарлайды Tura18.kz.
«Болашақ жастары және жасанды интеллект: білім мен идея дәуірі» атты жиынға жастар мәслихатының депутаттары, «Жастар рухы» ұйымының белсенділері, «Көкпекті жастары» қоғамдық бірлестігінің мүшелері мен ауданның белсенді жастары қатысты. Сонымен қатар Zoom платформасы арқылы арнайы шақырылған спикерлер сөз сөйледі.
Дөңгелек үстел барысында биылғы Жолдауда көтерілген негізгі бағыттар, соның ішінде жасанды интеллектіні дамыту, цифрлық білім мен инновацияны ілгерілету мәселелері кеңінен талқыланды. Жастар өз ой-пікірлерін ортаға салып, жаңа технологияларды игеру мен қолданудың маңыздылығына тоқталды.
Шара соңында Абай Құнанбайұлының 180 жылдық мерейтойын өткізуге белсене атсалысқан ауданның белсенді жастарына алғыс хаттар табысталды.
Әмір Бек
