Абай облысының Үржар ауданында ауыл тұрғындарының денсаулығын жақсартуға бағытталған маңызды әлеуметтік жобалар кезең-кезеңімен жүзеге асырылып келеді. «Ауылда денсаулық сақтауды жаңғырту» ұлттық жобасы аясында ауданның жеті елді мекенінде алғашқы медициналық көмек көрсетуге арналған нысандардың құрылысы толық аяқталып, ел игілігіне берілді, деп хабарлайды Tura18.kz порталы облыс әкімінің баспасөз қызметіне сілтеме жасап.
Атап айтқанда, Лайбұлақ, Қарабұйрат, Батпақты, Жоғарғы Егінсу, Ер Қабанбай, Благодатное және Некрасовка ауылдарында фельдшерлік-акушерлік пункттер, дәрігерлік амбулаториялар мен медициналық пункттер салынды. Биыл соның бесеуі пайдалануға берілді.
Жаңа медициналық нысандар алғашқы медициналық-санитариялық көмекті сапалы әрі қолжетімді көрсетуге қажетті толық инфрақұрылыммен және заманауи медициналық құрал-жабдықтармен қамтамасыз етілген.
Аталған жобалардың жүзеге асырылуы ауыл тұрғындарының өмір сүру сапасын арттырып, Үржар ауданында денсаулық сақтау саласын жүйелі түрде дамытуға берік негіз қалайды.
