Президент тапсырмасы аясында ҚР Премьер-министрінің орынбасары Ермек Көшербаев ішкі туризмнің сапасы мен қауіпсіздігін арттыру бағытындағы жұмыс сапарын жалғастырып жатыр. Абай облысына келген вице-премьер Алакөл көлінің жағалауындағы инфрақұрылымның жай-күйін көріп, демалушылармен, кәсіпкерлермен және медицина қызметкерлерімен кездесті, деп хабарлайды Tura18.kz.
Кездесу барысында санитарлық тазалық, рұқсатсыз сауда, қауіпсіздік пен абаттандыру мәселелері талқыланды. Жергілікті тұрғындар мен туристердің өтініштеріне орай келесі тапсырмалар берілді:
заңсыз саудаға қатысты санитарлық-эпидемиологиялық қызмет тарапынан тексеріс жүргізу;
жағалаудың тазалығын бақылауды күшейту және қоқысты уақытылы шығару;
демалушылар шоғырланған жерлерге қосымша қоқыс жәшіктері мен контейнерлер орнату;
тұрақты мобильді байланыс мәселесін шешу.
Сапар аясында Ермек Көшербаев жағалау аумағының жер пайдалану картасын қарап, қолданыстағы бас жоспарды қайта зерделеуді тапсырды. Сонымен қатар су айдынына заңсыз шектеу қою мәселесі көтеріліп, жергілікті билікке азаматтардың суға еркін қол жеткізуін қамтамасыз ету жүктелді.
Инфрақұрылымды жаңғырту
Алакөл жағалауын абаттандыруға биыл 658 млн теңге бөлінді. Қаражат мына бағыттарға жұмсалды:
108,9 млн теңге – Арбат алаңын жөндеуге;
171,6 млн теңге – қоғамдық кеңістік құруға;
107,5 млн теңге – жағалауды абаттандыруға.
Жағажайда 25 киім ауыстыру кабинасы, 50 қоқыс контейнері, 2 биодәретхана және 10 санитарлық торап орнатылды (маусым соңына дейін 18-ге жеткізіледі). Сондай-ақ жарықтандыру тартылып, 7 пирстің 3-еуі салынды, құтқару мұнаралары қойылды.
Қосымша бөлінген 300 млн теңгенің бөлінісі:
141,6 млн теңге – Кабанбай ауылындағы өрт сөндіру депосына;
57,7 млн теңге – құтқару станциясының құрылысына;
100 млн теңге – туристік аумақтың бас жоспарын әзірлеуге.
Жүйелі шешімдер қажет
Ермек Көшербаев өз сөзінде туризмді дамытуда уақытша емес, тұрақты әрі ойластырылған шешімдер қабылдау керектігін атап өтті:
«Біздің мақсат – таза жағажайлар, қауіпсіздік, тұрақты байланыс пен заманауи инфрақұрылым арқылы туристерге жайлы жағдай жасау. Туризм өңірлерге нақты экономикалық әсер әкелуі тиіс».
Оның айтуынша, барлық аймақта ортақ мәселелер анықталған: қоқыс жәшіктерінің жетіспеуі, рұқсатсыз сауда, байланыс әлсіздігі, заңсыз құрылыс. Осыған байланысты Үкімет әкімдіктермен бірлесіп, жаңа стандарттар әзірлеп, бақылауды күшейтуге кіріседі.
