Абай облысы әкімі Берік Уәлидің төрағалығымен өткен кеңейтілген аппараттық кеңесте өңірдегі жастар саясатының жүзеге асырылуы мен бұқаралық спортты дамыту мәселелері қаралды, деп хабарлайды Tura18.kz.
Жастар саясаты мәселелері жөніндегі басқарма басшысы Олжас Бейсенбаевтың айтуынша, облыста 150 мыңнан астам жас тұрады, оның үштен екісі қалада өмір сүреді. Биыл 7 мыңнан астам жас тұрақты жұмысқа орналасқан, ал 61 жас кәсіпкер «Бастау Бизнес» жобасы арқылы грант алған. Сонымен қатар, «Жасыл ел» бағдарламасы аясында 1000 жас маусымдық жұмысқа тартылып, 70-ке жуық жас отбасы өңірлік бағдарламалар арқылы баспаналы болған.
Облыста 13 жастар ресурстық орталығы жұмыс істейді. Дегенмен кей аудандарда кадр тапшылығы мен материалдық базаның ескіруі байқалады. Осыған байланысты жастармен жұмыс сапасын арттыру және орталықтардың жағдайын жақсарту жоспарлануда.
Аймақ басшысы жастар саясатын тиімді іске асыру үшін бірқатар тапсырма берді. Атап айтқанда, жастардың басқа өңірлерге көшу себептерін талдау, тұрғын үймен қамту тетіктерін әзірлеу және жастар арасындағы суицид, наркомания мен лудоманияның алдын алу шараларын күшейту жүктелді.
Жастар саясаты басқармасының басты мақсаты – жастардың идеясы мен бастамаларын қолдау, оларды қоғамдық өмірдің белсенді қатысушысына айналдыру, – деді облыс әкімі.
Кеңесте бұқаралық және кәсіби спортты дамыту мәселесі де талқыланды. Өңірде спорттың 72 түрі дамып келеді, 26 мекемеде 14 700-ден астам спортшы жаттығады. 451 спортшы ұлттық құрама сапында.
Берік Уәли дене шынықтыру және спорт басқармасына бұқаралық спортты дамытудың жаңа форматын әзірлеуді және инклюзивті спортты дамыту жоспарын дайындауды тапсырды.
Біз жалған есеп емес, нақты нәтижеге жұмыс істеуіміз керек. Әсіресе Олимпиадалық спорт түрлерін дамытуға ерекше көңіл бөлінуге тиіс, – деді аймақ басшысы.
