Абай Құнанбайұлының кесенесі орналасқан Жидебай қорығы маңында заманауи туристік кешен салынады, деп хабарлайды Tura18.kz.
Туристік жобаның құрылысы басталар тұста Абай облысының әкімі Берік Уәли мен кәсіпкер Бектас Медғатов 60 гектар жерге уақыт капсуласын орнатты. Кешеннің атауы Taukum Ethno Park болады.
Әкімдік таратқан мәліметке сәйкес, жоба ақынның 180 жылдығына орай жеке инвестиция (1,2 млрд теңге) есебінен жүзеге аспақ. Этноауыл Абай, оның інісі Оспан және жиені Шәкәрім мен Ахат жерленген тарихи мекеннің дәл жанында бой көтереді.
Жоба аясында не салынады?
Кешен құрамына жыл бойы жұмыс істейтін киіз үй форматындағы демалыс орындары мен бунгало-стильдегі қонақүйлер, этно-SPA орталығы, сақ дәуіріне тән монша, балалар мен спорт алаңдары, қоғамдық тамақтану орындары кіреді.
Сонымен қатар ипподром, шағын зоопарк, конференц-зал, тимбилдингке арналған аумақтар, электромобильдерге арналған қуаттау бекеттері мен ЖҚС, қызметкерлерге арналған жатақхана да жоспарға енген.
Қашан іске қосылады?
Құрылыс жұмыстарының алғашқы кезеңі 2025 жылдың тамыз айында басталады. Жоба толық іске қосылған соң 50 тұрақты жұмыс орны ашылады деп күтілуде.
Әкімдік өкілдері бұл бастама өңірдегі туризмді ілгерілетіп, Жидебайды халықаралық деңгейдегі нысанға айналдыруға ықпал ететінін атап өтті.
Алғы шарттар қалай қалыптасты?
Бұған дейін кәсіпкер Сырымбек Тау Жидебайда туристерге қолайлы жағдайдың жоқ екенін айтып, өз бастамасымен визит-орталық, «Pana» қонақүйі мен «Tary» мейрамханасын салуға уәде берген еді.
Қазірдің өзінде алғашқы нәтижелер бар: мерейтой қарсаңында «Beeline» операторының 4G интернеті іске қосылып, Жидебай даласында тұрақты байланыс мүмкіндігі пайда болды.
