Семей қаласында Халықаралық қарттар күніне орай «Қарттарға құрмет – ұрпаққа міндет» атты мерекелік іс-шара өтті. Аға буын өкілдеріне тағзым етіп, олардың ел дамуына сіңірген еңбегін ұлықтауға арналған жиынға қала әкімі Әділет Қожанбаев, еңбек ардагерлері мен қариялар қатысты, деп хабарлайды Tura18.kz.
Қариясын қадірлеп, үлкенін сыйлаған халықтың өнегелі дәстүрі ұрпақтан-ұрпаққа жалғасып келеді. Өмір жолы өнегеге, еңбек жолы тәжірибеге толы аға буын өкілдері – қоғамның рухани тірегі, кейінгі ұрпаққа бағыт-бағдар беретін ақылман жандар. Олардың маңдай терімен қаланың іргесі бекіп, өндірісі өркендеп, білім мен мәдениет салалары дамыды. Мерекелік кездесудің де негізгі мақсаты – осындай азаматтардың еңбегін бағалап, оларға құрмет пен ризашылық білдіру.
Қала әкімі жиналған қауымды мерекемен құттықтап, ардагерлердің Семейдің әлеуметтік-экономикалық дамуына қосқан үлесін ерекше атап өтті. Сондай-ақ олардың жас ұрпақ тәрбиесіндегі орнына тоқталып, бүгінгі жетістіктердің негізінде аға буынның қажырлы еңбегі жатқанын жеткізді.
Семейдің өсіп-өркендеуіне, өндірісі мен шаруашылығының дамуына, білім мен мәдениетінің биіктеуіне әрқайсыңыз үлес қостыңыздар. Ұстаз болып шәкірт тәрбиеледіңіздер, дәрігер болып адам жанына араша түстіңіздер, еңбек адамы болып қаламыздың іргесін бекіттіңіздер. Отбасында ұл-қыз өсіріп, оларға адалдық пен жауапкершілікті, елге қызмет етудің мәнін үйреттіңіздер. Бүгінгі ұрпақ сол еңбектің игілігін көріп отыр. Сондықтан сіздерге көрсетілер құрметтің негізінде ең алдымен үлкен ризашылық жатыр, – деп атап өтті Әділет Қожанбаев.
ҰРПАҚ САБАҚТАСТЫҒЫ ҮЗІЛМЕЙДІ
Қазір Семейде 57 мыңнан астам қарт бар. Сонымен қатар 200-ге жуық бастауыш ардагерлер ұйымы белсенді қызмет атқарып келеді. Бұл ұйымдар аға буын өкілдерінің басын қосып, олардың қоғамдық өмірге араласуына, өзара байланысын нығайтуына мүмкіндік береді.
Қала әкімі ардагерлердің өмірлік тәжірибесі мен ақыл-кеңесінің қоғам үшін маңызы зор екенін атап өтті. Өйткені үлкендердің өнегесі мен тағылымды әңгімелері – кейінгі буынға қалатын асыл мұра. Ал ұрпақ сабақтастығын сақтау, қариялардың қадір-қасиетін арттыру және олардың қоғамдағы белсенділігін қолдау – ортақ жауапкершілік.
Қарияларға құрмет көрсету бір күндік мерекемен шектелмейді. Ол күнделікті өмірде үлкенге ізет білдіруден, жалғызбасты қарттарға қолдау көрсетуден, олардың мұң-мұқтажына назар аударып, ақыл-кеңесін бағалаудан көрініс табады. Осы тұрғыдан алғанда, ардагерлердің басын қосқан мұндай кездесулердің тәрбиелік мәні де ерекше.
АРДАГЕРЛЕР МАРАПАТТАЛДЫ
Мерекелік іс-шара барысында бірқатар ардагер қала әкімінің Құрмет грамотасымен марапатталды. Бұл – саналы ғұмырын еңбекке арнап, елдің өсіп-өркендеуіне үлес қосқан азаматтарға көрсетілген құрметтің белгісі.
Өз кезегінде аға буын өкілдері ұйымдастырушыларға ризашылықтарын білдіріп, көрсетілген ықылас пен құрмет үшін алғыс айтты.
Қарияның батасы мен өнегесін бағалау – ұлттық болмысымыздың ажырамас бөлігі. Өйткені өткеннің өнегесін ұлықтап, бүгіннің қадірін білген қоғам ғана болашаққа сеніммен қадам басады. Ал үлкенге құрмет көрсету – ұрпақтың парызы ғана емес, елдіктің де белгісі.
